Այդ սթրեսի ազդեցությունը մի քիչ թեթեւացնելու համար բժիշկն առաջարկում է, օրինակ, մի քանի բեռնաթափման օրերի օգնությամբ օրգանիզմը պատրաստել ամանորյա տոներին…
Ամանորյա տոներից հետո գրեթե բոլոր մաշկային խնդիրները (հատկապես ալերգիկ եւ քրոնիկ հիվանդությունները), որպես կանոն, սրվում են։ Մաշկաբան-վեներոլոգ Հովհաննես Հովհաննիսյանի խոսքով այս տոների ժամանակ մարդկանց մեծամասնությունը չի կարող պահպանել իրենց սովորական սննդակարգը, իսկ տարբեր ճաշատեսակների խառնումն ու ալկոհոլի չարաշահումը միանգամից անդրադառնում են ինչպես մաշկի վիճակի, այնպես էլ օրգանիզմի բոլոր օրգանների վրա։
«Գրեթե բոլոր մաշկային հիվանդությունները սրվում են ամանորյա տոներից հետո. ոգելից խմիչքները, շատ տարատեսակ ուտելիքները, օրվա խախտված ռեժիմը մեծ սթրես են օրգանիզմի համար եւ բերում են շատ խնդիրների սրման»,- NEWS.am Medicine-ի թղթակցի հետ զրույցում նշել է բժիշկը։
Այդ սթրեսի ազդեցությունը մի քիչ թեթեւացնելու համար բժիշկն առաջարկում է, օրինակ, մի քանի բեռնաթափման օրերի օգնությամբ օրգանիզմը պատրաստել ամանորյա տոներին։ Հիմա, իհարկե, այս խորհրդին հետեւելն արդեն ուշ է, բայց աշխատեք հիշել այն մյուս տոներին։
Եթե Ձեր մաշկային (կամ այլ) հիվանդությունները նույնպես սրվել են, հնարավոր է՝ պետք է մտածել բժշկի դիմելու մասին։ Մարդկանց մեծամասնության համար ամանորյա տոները դեռ շարունակվում են, բայց այդ օրերին շատ բժիշկներ նույնիսկ ավելի շատ են աշխատում, քանի որ «ամանորյա» սրացումներով շատ մարդիկ են դիմում նրանց։
Եթե Դուք Ձեզ այնքան էլ լավ չեք զգում տոների ընթացքում շատ ուտելու պատճառով, փորձեք Ձեզ համար բեռնաթափման օր եւ նույնիսկ օրեր կազմակերպել, եթե իհարկե, որեւէ հակացուցում չկա։ Բեռնաթափումը կարող է կարգավորել օրգանիզմը եւ բարելավել ինքնազգացողությունը։